Arraianos ARRAIANOS Un filme de Eloy Enciso Os habitantes dun pequeno pobo perdido nas montañas entre Galicia e Portugal viven e traballan rodeados por un bosque sen fin. Incapaces de atopar unha saída, os Arraianos pregúntanse polas razóns do seu confinamento. Un día, un estraño chega: a posibilidade dun cambio, unha saída, unha vía de purificación...

Nalgún lugar entre a realidade e o soño, os Arraianos interpretan as súas propias vidas construíndo unha fábula sobre o mundo rural e o seu obstinada resistencia a desaparecer. Que queda tras o final, cando todo foi consumido?

Título: ARRAIANOS

Duración: 70 min.

Cor: Cor

Formato de gravación: Dixital HD

Lingua orixinal: Galego

País de produción: España

Produción: Artika Films

Coprodución: Zeitun Films

Ano de produción: 2012

Con Eulalia González, Aurora Salgado, Celsa Araujo e Antonio Ferreira

 

Director: Eloy Enciso

Guionistas: Eloy Enciso e José Manuel Sande, a partir da obra de Jenaro Marinhas del Valle O Bosque

Director de fotografía: Mauro Herce

Dirección de actores: Manolo Fontemoura

Son directo: César Fernández e Joaquín Pachón

Mesturas de son: Vasco Pimentel e Tiago Matos

Montador: Manuel Muñoz

Directora de produción: Rocío Cabrera

Xefa de produción: Beli Martínez

Produtores: Carlos Esbert · Eloy Enciso

Coprodutor: Felipe Lage Coroz

FESTIVAIS E PREMIOS

Festival de Locarno (Suíza)

Hamburg Film Festival (Alemaña)

Festival de Vancouver (Canadá)

DocsLisboa (Portugal)

Festival de Nouveau Cinema de Montreal (Canadá)

Viennale (Austria)

SEFF Festival de Cine Europeo de Sevilla. Premio Mellor Película Nuevas Olas

REC Tarragona

Cineuropa Santiago de Compostela

First Look – Museum of Moving Images NY (EUA)

Premio Acto de Primavera

FICUNAM – Festival Internacional de Cine UNAM (México). Mención Especial

Play-doc Festival Internacional de Cine Documental

Festival Cinemateca Uruguaya (Uruguai)

BAFICI Buenos Aires Festival Internacional de Cine Independiente (Arxentina). Premio Vanguardia y Género

D’A Festival Internacional Cinema d’Autor Barcelona. Premio Nou Talent

Transcinema (Perú). Premio Transcinema

Melbourne International Film Festival (Australia)

Cinespaña. Festival du Cinéma Espagnol de Toulouse (Francia)

Underdox. Festival Für Dokument und Experiment Münich (Alemaña)

Notas do director

Pensando en como combinar na película a trama da obra O bosque co rexistro do cotián, lin nos diarios de Vertov unha reflexión sobre a natureza da imaxe que acabou por ser importante para o proceso de creación da película: “Se filmas unha mazá real e unha falsa de modo que non poidas diferencialas, iso non significa que saibas filmar. Significa de feito o contrario. Deberiamos filmar a mazá real de tal forma que non sexa posible ningunha imitación”. No canto de traballar na fronteira de xéneros cunha soa linguaxe híbrida, decidín explorar dúas linguaxes aparentemente antagonistas que non tivesen outra alternativa que coexistir e crear un diálogo entre eles, como fan o home e os animais ou a realidade e os soños.

Neste sentido, a identidade xeográfica á que fai referencia o título (os arraianos, habitantes da fronteira galaico-portuguesa) é un pretexto para facer un filme fronteirizo no sentido da dualidade entre realidade e imaxinación: o que se imprime na memoria como unha mestura de realidade e a construción mítica desa realidade.

Existía tamén o desexo e o reto do traballo co idioma, poder retratalo non tanto como vehículo de mensaxe senón ante todo como expresión plástica e musical. Elixiuse O Bosque como o texto para traballar este aspecto porque me pareceu que o autor se achega a esa idea que defendía Straub: “facer que as pedras sexan como palabras e as palabras como pedras”. Por ese desexo e polo de retratar certa esencia do lugar, quixen traballar con actores non profesionais nun rexistro non naturalista. Explorar eses pequenos xestos, sutís movementos ou xiros da voz que mostran quen é, a pesar de todo, a persoa que encarna ao personaxe; é dicir, ese substrato ou esencia documental (e plástica) que sobresae e brilla, precisamente, a partir dun dispositivo de ficción.

En Arraianos, o conflito dos personaxes ou o contexto histórico no que ocorre o filme está exposto de forma aberta. Esta decisión xera ás veces debates con amigos ou espectadores acerca de por que non mostrar claramente en que tempo ocorre, cal é “o tema principal” ou que conclusión debemos extraer do filme. Traballar deste xeito non se debe a unha vontade intelectual ou de abstracción, senón a querer propoñer ao espectador unha relación en primeiro lugar sensible coas imaxes e o son. Trasladarlle tamén parte da responsabilidade (o privilexio en realidade) de decidir o sentido da procura e loita dos personaxes, do filme no seu conxunto. Que se produza un diálogo coa memoria, na cal existen conflitos, incongruencias e significados abertos que cambian no tempo. A intención última é tentar non embalsamar as imaxes, que sexan porosas para que continúen estando vivas unha vez terminou o filme.

Esta web utiliza cookies propias y de terceros para su correcto funcionamiento y para fines analíticos. Al hacer clic en el botón Aceptar, acepta el uso de estas tecnologías y el procesamiento de sus datos para estos propósitos. Más información
Privacidad